قلبي
لسا الشوق
بياخدو
يروح يصبح
ع الميدان
ورغم أن البرد
قارص
لسه دفيان
المكان
لسه جايه كتير
صبايا
ولسه جاي
شباب
ولسه فيه أطفال
بترسم
بُكره
وشيخ كبير
في السن طاعن
جاى ب يعيد
اللي كان
كُل خطوه
ب تمحى ذنب
وكُل خطوه تزيح
هوان
يبتسم
يهمس لنفسُو
والله
واهو آن الآوان
وكُلو شوق
ب يناجى ربو
نفسي اموت
وانا مُش جبان
وناس كتير
من كُل حته
ب تشتعل
رايحه الميدان
ولسا
مانزلش العساكر
لسا ما تذاعش
البيان
لسا كُل الناس
بتحلم
عيش وحريه
وأمان
لسا فيها
الحلم اخضر
نفسها يجود
الزمان
تكبر الاحلام
وتطرح
تلقى جوا الكون
مكان
مش مهم تكون
أوربا
ومش مهم تكون
يابان
المهم السجن
يفتح
يبقى تانى
مافيش ليمان
والمكن يبدء
نشيدو
منتظر طرح
الغيطان
كان جميل
الحلم جداً
فجأه وسمعنا
البيان
وبعدها
اتفرقنا تانى
مين مسيحى؟
ومين كفايه؟
ومين كمان؟
كل شيخ
ومعاه طريقتو
وألف رحممه
على الميدان
وعُمرنا
ما زرعنا حلم
وشفنا وقت
حصادو
آن
ولسا قلبي
الشوق بياخدو
يروح يصبح ع
الميدان