جوايا حاجات ب تُشرُق
حتى ف عز المغيب
وحاجات كتير تضحَك
ف قمة النحيب
وحاجات تبعدنى جدا
في عز ما اكون قريب
وفى وسط الزحمه جدا
ب اكون كائن غريب
بسمع حاجات لوحدى
واشوف حاجات لوحدى
وساعات كتير ب اغيب
واسحب من نفسي روحى
واتملى كتير جروحى
واغسلها بعود وطيب
وازرع نخيل وطارح
وتحتو كتير مطارح
ويضلل ع الغريب
وافتح بيبان هوايا
ب ألف حديث واية
واتعوذ م الغوايه
واكون م الباب قريب
اطبطب ع اللى راجع
وارفع عنو المواجع
واهمس لو مافيش موانع
أدخل ما انتاش غريب
جوايا حاجات بتشرُق
حتى ف عز المغيب
وف عز الكون ما يشرُق
جوايا حاجات تغيب
جوايا حاجات تغيب
ليست هناك تعليقات:
إرسال تعليق