ومسير الحظ يضرب
ومسيرها الدُنيا
تيجى
والعب بطوله وحدى
ويطرودوا المليجى
واجيب قنديل يغنى
من جد ومن حقيقى
والاقى الباب يخبط
هيفاء
ب تقول ما تيجى
وابوس الواوا وحدى
واشرب وابل ريقي
وابعت لهريدي يبعت
مليون صندوق
معسل
والديلر وحدو
ييجى
ومعاه كُل اللى
ينعش
والهبو م
الحقيقى
واليسا تقولى فينك
عاملا
الفطار ب أيدى
أأقولها ف مارينا
تقولى لأ في بارى
وأقول لها ف طريقي
ومسير الحظ يضحك
والدنيا تروق تمام
واللحمه تخُش بيتنا
ونعرف طعم الحمام
وانام في الأوضه
وحدى
زهقت من الزحام
وسرير يكون بتاعى
وخالي من الزُكام
وييجى السواق
ياخُدنى
(لما القا شُغل
يعنى )
ويعطفوا اللئام
ولما ادى لحد رشوه
يقولى لأ حرام
بطلنا الرشوه
خااالص
وبقينا في التمام
من يوم ما الثوره
نجحت
وبطلو الكلام
وكل بيت ب ينتج
بط ووز وحمام
وبقينا كمان نصدر
لروسيا واليونام
قصدي اليونان
ياسيدى
لكن خانى
الكلام
وكمان أمريكا طلبت
منا بواقي الطعام
ح نعمل أيه؟
غلابه
مع أنُهم لئام
ومش وقت عتاب يا
اخينا
واحنا ياسيدى
الكرام
ولقيتني فجأه ب
اصحا
على صوت عبد السلام
بيقولى الميه قاطعه
وب يعزفوا السلام
حُسنى اخد البراءة
والعدلي في التمام
ساعتين خلاص ويُخرج
وب يمسكوا اللئام
اللى الاحلام
خدتهُم
يلا نزوغ أوام
وجرينا بسرعه
نُصرُخ
ونبوس رجل المدام
تقبلنا معاها نرقص
ونتوه وسط الزحام
بصت لى بنُص زغره
وقالت لى خلاص
كلام ؟
ماعادش الرقص عيبه؟
واحلوت المدام ؟
قلنا لها نبوس
أيديكى
فُكينا من الملام
وبلاش نقول في عرضك
ل تحورى الكلام
تشوفيلنا أى صرفه
ومش ح نقول بكام
ولما الحظ يضرب ؟
ضحكت
وقالت لى نام
خلص الكلام ياروحى
والحظ خلاص سلام
وماعادش يروح
ياعينى
غير للناس التمام
ومسحت بكُمي عينى
قلتلها صحيح تمام
وادو المليجى دورى
وبلغوه سلام
وان عاز كومبارس
يعنى
انا راضى وب انسجام
ومسيرها الدُنيا
تضحك
وتروق للغير
تمام