هنيه

 

واللي يقولك مصر جميله قوللو جميله لبعض الناس

 

واللي يقولك مصر جميله

قوللو جميله لبعض الناس

ناس عايشاها ملوك مرتاحه

وناس عايشاها لكن مُش ناس

كده ع الهامش ماشيه تعافر

لُقمة عيشها وحانيه الراس

ل اجل الهدمه ول اجل دواها

ول اجل عيالها ما يوم تحتاس

ول اجل ماتختم ختمه كريمه

وماتتهانش لدا الإحساس

ان بلدهم كارهه وجودهم

مُش حاسباهم أصلاً ناس

والناس فيها لصوصها ودونها

وأي شواذ وتحوت الناس

واللي مالوش ولا دين ولامِله

ولا حاسيين بألآم الناس

ولا شايفينا ف مصر معاهم

ولا حاسبينا أساساً ناس

ملعون أبوها

 

ملعون أبوها بلد

اللي ابقى فيها أجير

والعرص عايش ملك

واللص فيها وزير

ونعيش عشانهم غفر

بنحل في الفوازير

تمن الرغيف صحتك

ودواك من المحاذير

والسجن والمشنقه

لوقُلت لأ دا كتير

أو يوم خيالك حلِم

بقليل من التغيير

مصر ما بتنصُرش حد

 

مصر ما بتنصُرش حد

م اللي كابد واللي جاهد

واللي ثابر واللي جد

مصر بس لطبالينها

ورقاصينها وأي حد

غاوي هيصه وزمبليطه

وعُمرو مره ماعاشها جد

حد لين حد طيع

حد يعنى مالوهش حد

في الدياثه وف الوساخه

والنجاسه واخدها بند

من أهم بنود حياتو

ومعتبرها أهم بند

مش مصدق؟ هات دفاترك

يلا بينا وهات يا عد

يلا نجرد مين صانتهُم

مصر م اللى عاشوها جد

 

 

 

 

 

 

حررني يارب من الشاعر وانصُرني عليه

 

 

حررني يارب من الشاعر

وانصُرني عليه

وانصفنى يارب يغور يخفى

وما عُدت الاقيه

طلع دين أُمي ب أحلامو

وفي الأخر أيه؟

طلعت أوهام وعلى الفاضي

عيشنى ف تيه

لا انا طايل اعيشو لده الواقع

ولا نفسي لاقيه

مسكون بالحُزن وبالحيره

وشجون ب اقاسيه

وبقيت مستودع للخيبه

وهزايم أيه؟ 

ينهيها يارب انك تأذن

تُنصُرني عليه

وتحرر نفسي من الشاعر

وأكون كما أيه ؟

إن شا الله يارب بهيم حتى

أو اُيها أيه

بطنجي مُتكاسل مُتزمت

ما يهمني أيه؟

في العالم يخرب أو يعمر

ولا حاسس بيه

حررني يارب من الشاعر

وانصُرني عليه

البلد دي للسكارى

 

البلد دي للسكارى

ورقاصات ومغنيين

م النواعم بالي بالك

ممحونين ومُخنثين

أما شُعرا ف عند مامتك

دمهُم بارد لعين

من بتوع علم وحضاره

والوطن كنزُاً ثمين

والكرامه شيء مُقدس

والعداله شِبه دين

والجميع لازم يعيشها

في البلد دي مواطنين

يعنى أحمد زي عبدو

زي جرجس واسماعين

لأ وأيه قال كُلو سيد

في الوطن وكمان مكين

مش بقولك حلم أهبل

واللي صدق مهفوفيين

البلد دي ياعم طارق

ليها باع جامد متين

في المناهده وفي المكايده

وفي العناد للطيبين

واللي فاهمين الحقيقه

واللي في قلوبهم خزين

م الطهاره والكرامه

والغرام ومُثقفين

كل مراكبك غادرت شطك

 

كل مراكبك غادرت شطك

مابقاش فاضل ليك غير صمتك

والحواديت الساكنه ملامحك

قالت كل ما فيك من شو ق

فجأه خلاص العُمر أهو ولى

عدى يادوب وكأن ف ضله

قعدت تريح وح تتجلى

وتغزل شعرك قفل الطوق

خلى حروفك تدخل تانى

جوا كهوفها وحزن تعاني

بعد ما كانت طارحه أغاني

ساد الصمت ما عادش شروق 

وانتا لوحدك حتى اهو ضلك

راحل سايبك تنهار كلك

حتى ماهانش عليه يشاورلك

أو يهمسلك بكره ترو ق

في بلادى الحلم مُمكن

 

في بلادى الحلم مُمكن

ياخدك لبعيد بعيد

وتلاقى فجأه نفسك

مسجون لابس حديد

لمُجرد بس حلمك

ب ال بُكرا يجيب جديد

أو ناس تاخُد حقوقها

أو يتجرأ وليد

يرضع من صدر أمو

قبل سيادة العميد

ما يوافق ع الرضاعه

بعد ما نقرا النشيد

عن أيامنا الجميله

جوا الوطن السعيد

وسعيد في خيالو هوا

أما احنا ف في الحضيض

في بلادى اللى انتا عارف

حلمك مُمكن يبيد

شجرة أسلاف جدودك

ويلبسكُم حديد