26‏/4‏/2023

حد

 


محتاج أتكلم وبشده

مع أيُها حد

يسمع ويهز كده دماغو

وح اعتبرو انا رد

أو حتى يقلب في كفوفو

وانشا الله ما رد

لكن مُشتاق أني أتكلم

مُشتاق وبجد

وجنوني ياناس اني أتكلم

زاد فوق الحد

ويُفضل حد لا يعرفني

ولا يعرف حد

من كُل الناس اللي اعرفهُم

ولسابع جِد

حد يحسسني انو سامعني

وانشا الله ما رد

ويسيبيني اتكلم وبراحتي

ولا هات ولا خُد

ولحد ما اخلص ع الاخر

يا سلام لوحد

القاه كده واقف مستنى

بيقول ياض خُد

وتعالى أتكلم وبراحتك

انا حد بجد

راح يسمع منك للاخر

ولا عُمري ح ارُد

دا انا ليلة قدري تكون بانت

لو الاقي ال حد

ح احكيلو لحد مايكرهني

من طول السرد

عن حُزني البالغ كده اخرو

للشكوى ل حد

يسمعنى وبس بدون همسه

ولا ينطق رد  

أصل ال انا عندي مالوش أخر

ولا ينفع رد

ولا حتى راح اخُد بكلامو

ولا ح ارخي الشد

أنا عايز بس اني أتكلم

مع أُيها حد

وأديني مكمل مستني

القاك يا الحد

24‏/4‏/2023

مُش طالبه معاك حكاوي

مُش طالبه معاك حكاوي

مُش طالبه معاك كلام

ولابتدندن غناوي

وتجود في المقام

ولاباصص حتى ناحية

قمرك خلف الغمام

ساكن وحدك في قهرك

حاطط مليار لجام

للبوح ومداري وجعك

جواك تحت ابتسام

بيقول القصه خلصت

وعلى الدنيا السلام

وماعادش بييجي منها

ولاحتى ليك غرام

يهمس قلمك ووترك

مره ينول المرام

تكتبلو شطر واحد

وتبوح ب احلى الكلام

قاتلك صمتك ووحدك

حتى ف عز الزحام

مُش طايق حتى نفسك

ولا باينلك ختام

غير إن الصمت خيم

على روحك والكلام

مابقاش لُه فايده خالص

ولاعاد فيه انسجام

بينك والكون دا كُلو

ولافاضل غير عتام

في كهوف روحك وباين

شوقك قوي للختام 


 

راحت سنينك